Gudoomiye Jawaari “Looma dulqaadan doono khilaaf dambe oo soo kala dhex gala Madaxweyne iyo raisul wasaare"

Gudoomiyaha baarlamanka Somalia Maxamed Cismaan Jawaari ayaa madaxweynaha iyo raisul wasaaraha dalka uga baaqay iney ka fogaadaan wax kasta oo khilaaf ka dhex abuuri kara.

Jawaari ayaa hadalkan ka sheegay kulankii baarlamanka ee maanta oo codka kalsoonida lagu siiyey raisul wasaare Cumar C/rashiid Cali Sharmarke.

“Dalkeena ma xamili karo, shacabkana uma dulqaadan doonaan khilaaf dambe oo la mid ah kii xukuumadii hore oo dalka geliyey xasilooni daro siyaasadeed muddo labo bilood ah, Ilaahay baa naga dhameeyey maahane xaalad qatar ah ayuu dalka geliyey” ayuu yiri gudoomiyaha Baarlamanka.

Maxamed Cismaan Jawaari ayaa sheegay in khilaafkii ugu dambeeyey ee madaxda dowlada uu saameyn xun ku yeeshay baarlamanka, uuna curyaamiyey howlihii xukuumada, isagoo madaxda dowlada ugu baaqay iney ka fogaadaan khilaafaadka ayna bulshada ugu shaqeeyaan si daacadnimo ah.