Raisul wasaaraha Somalia oo ka hadlay hub fara badan oo xalay ciidamada dowladu ka qabteen Muqdisho

Raisul wasaaraha Soomaaliya Dr. C/weli Sheekh Axmed ayaa ugu hambalyeeyay ciidamada amniga howlgal ay ku soo qabteen xalay hub faraha badan oo ka dhacay xaafada Buulo Xuubey oo ka tirsan degmada Wadajir ee G/Banaadir.

Dr. C/weli Sheekh Axmed ayaa xusay in howlgalkani uu sii socon doono tan iyo inta laga xaqiijinayo nabadgelyada dalka.

“Waxaan ku bogaadinayaa ciidamada amniga oo dadaalkoodu keenay in dhabarka laga jebiyo cadowga, hubka intaa la egna laga soo qabto, aad iyo aad baan ugu hambalyeeyneynaa wasiirka wasaaradda amniga, ciidamada amniga iyo taliyayaashoodaba, howshanu waa howl dhaxalgala ah waxaan rajeynayaa inay sii socoto ilaa la gaaro in magaalada Muqdisho iyo dalka intiisa kale ummadda Soomaaliyeed ay si cabsi la’aan ah ugu noolaadaan.”ayuu yiri Dr. C/weli Sheekh Axmed oo ka hadlayey munaasabad lagu soo bandhigay hubkaas oo lagu qabtay Muqdisho.

Wasiirka amniga Qaranka Khaliif Axmed Ereg ayaa sheegay in hey’adaha sirdoonku soo gudbiyeen xogta hubkan isla markaana ay ciidamadu xalay ku guuleysteen iney gacanta ku soo dhigan hubkaan.

“Hubkani waa hubkii lagu gumaadi jiray shacabka Soomaaliyeed oo kooxaha nabad diidka ah ay adeegsan jireen isla markaana dad wax magarad ah inta laga iibiyo u gudbin jiray argagixisada, hubkani wuxuu ahaa mid hey’adaha sirdoonku ay ku daba jireen isla markaana, iyadoo aan dhibaato ka dhicin caawa lagu guuleystay in gacanta lagu soo dhigo.” ayuu yiri wasiirka amniga Qaranka.