Rag uu ku jiro ninkii fududeeyey weerarkii madaxtooyada oo saaka lagu toogtay Iskoolo Buluusiyo

Maxkamada ciidamada qalabka sida ee dowlada Somalia ayaa saaka xukun dil ah ku fulisay saddex nin oo la sheegay iney ka tirsanaayeen kooxda Al-shabaab kuwaasoo dhowaan maxkamadu ay ku riday xukun dil ah.

Mid ka mid ah raggan la toogtay ayaa waxaa lagu magacaabi jiray Xasan Muxudiin Xasan, waxaana uu ahaa ninkii fududeeyay weerarkii bishii Ramadaan lagu qaaday Xarunta Madaxtooyada, isagoo qirtay inuu la shaqeynayey Al-Shabaab gaarigiisana ku soo qaaday kooxdii weerarkaas fulisay wuxuuna ka mid ah ninkan dadka madaxtooyada ka shaqeeya.

Labada nin ee kale ee saaka la toogtay oo lagu kala magacaabi jiray Aadan Maxamed Xasan iyo Bashiir Xasan Maxamed ayaa iyana waxaa lagu eedeeyey iney ka tirsanayeen amniyaatka Al-shabaab, waxaana ay qirteen iney dileen dad 20 qof ka badan oo isugu jiray askar, xildhibaan, shaqaale dowladeed iyo dad kale.

Gudoomiyaha Maxkamada ciidamada qalabka sida Liibaan Cali Yarrow oo saxaafada kula hadlay fagaaraha iskoolo Buluusiyo oo saaka xukunkaas toogashada ah uu ka dhacay ayaa sheegay in raggan saaka la dilay dhamaantood ay maxkamada horteeda ka qirteen dembiyada lagu soo eedeeyey